Patay na sang nasapwan sa tunga sang talamnan sa Barangay Alugmawa, Lambunao, Iloilo ang isa ka lalaki.
Ang biktima amo si Rolando Alonday, legal ang edad, residente sang Brgy. Supanga, Calinog Iloilo.
Sa interview sang Bombo Radyo kay Police Major Roy Tayona, hepe sang Lambunao Municipal Police Station, iya ginpahayag nga sang nasapwan ang biktima sa lugar, nakit-an nga may pilas ini sa ulo.
Suno kay Tayona, nagatrabaho lamang ang biktima bilang isa ka mangunguma sa Brgy. Alugmawa, Lambunao, kon sa diin, nagapang-garab ini sang mga humay.
Ginklaro man sang natungdan nga yara lang man ang balay sang biktima malapit sa kon diin ini nakit-an nga nagahamyangon.
Temporaryo lamang ini nga nagatinir sa lugar bangud man sa iya nga trabaho.
Nag-request na ang talatapan sa Regional Forensic Unit VI kag Scene of Crime Officers (SOCO) agud ipaidalum sa examination ang lawas kag matumod kon ano ang gintunaan sang pilas sang biktima.
Sa subong, padayon nga ginaimbestigaran ang natabo sa biktima agud nga matumod ang rason sang iya nga kamatayon.
