Nadakpan sang kapulisan ang ginakabig most wanted person nga 28 na ka tuig nga nagapanago sa kaso nga murder sa Brgy. Manaulan, Lambunao, Iloilo.
Ang naaresto amo si Alyas Gerry, 59-anyos, kag isa ka mangunguma.
Sa interview sang Bombo Radyo kay Police Captain Winston Biadog, officer-in-charge sang Lambunao Municipal Police Station, iya ginpahayag nga nagapanago ang lalaki sa Mindanao kag sang sini lang, nakabaton sang impormasyon sa pamilya sang biktima nga nakita ini sa nasambitan nga barangay.
Ginpahayag sang natungdan nga sa Brgy. Paho, Lambunao ginkomiter sang suspek ang krimen sang tuig 1997 kun sa diin natiruhan sini ang biktima.
Ginpanginwala naman sang suspek ang krimen nga ginpahayag nga atubangon nalang sa korte ang kaso.
Yara subong sa kustodiya sang Lambunao Municipal Police Station ang suspek para sa nagakaigo nga disposisyon.
(Article: Bombo Phauline Pillora)
