Kun gugma na gani ang pagahambalan, daw halos wala sang imposible bangud tanan masarangan himuon sang tawo.
Kaangay sang Vietnamese nga lalaki nga daw maano na gid bangud duha ka tuig niya nga wala makit-an ang iya asawa nga nagatrabaho sa India.
Ang lalaki amo si Ho Hoang Hung, nagaedad sang 37 anyos.
Halin sa Ho Chi Minh City sa Vietnam, nagbyahe si Hung padulong sa Bangkok, Thailand agud kuntani nga makasakay sa eroplano kag makalab-ot sa Mumbai, India.
Sa malain nga palad, bangud wala nakakuha sang visa kag wala nag-ugyon ang panahon, nagpadulong na lang si Ho sa Pattaya, isa man ka syudad sa Thailand.
Bangud desperado siya sa iya misyon nga makit-an ang iya asawa, nagdesisyon ini nga magsakay sa isa ka gamay nga rafting boat.
Ang plano ni Ho amo nga magtabok sa dagat paagi sa pag-paddle, apang nakahibalo ka kun daw ano kalayo ang iya kinahanglan i-paddle agud makalab-ot sa India? 2,000 kilometros!
Sang ginabanta 80 kilometros na ang kalayuon sang na-paddle ni Ho halin sa mainland sang Thailand, may isa ka fishing boat nga nagtawag sa maritime security agud ma-rescue si Ho bangud nahadlok sila kun ano ang matabo sa iya.
Sang ginpadulungan sang otoridad si Ho, nakit-an ang dala sini nga suitcase, may botelya sang tubig apang wala na halos sang unod, may 10 ka pakete sang noodles — apang ang masadya — wala man lang ini sang mapa, compass, GPS, ukon ekstra nga panapton.
18 ka gab-i man ang gintinir ni Ho sa tunga sang dagat, apang wala na siya ginpasugtan nga magpadayon sa lawod kag gindala siya liwat sa Thailand.
Kun basehan lang ang iya nga kadasigon, ginabanta 625 ka adlaw pa ini antes nga makalab-ot sa India — apang ina kun wala sang malain nga matabo sa iya, bangud sang amo nga tion, may yara sang bagyo nga gina-forecast sa Bay of Bengal.
Ginbuligan si Ho nga mabutang anay sa isa ka temporaryo nga puluy-an kag gilayon man nga ginpakig-angutan ang Vietnamese embassy kag ang Indian embassy agud nga makita na sini ang iya nga asawa.##
