ILOILO – Padayon pa nga ginahibalo sang mga pulis ang identity sang isa ka lalaki nga nasapwan nga patay na sa higad sang karsada sa Barangay Daan Banua, Estancia, Iloilo.
Ang biktima ang nagasuksok sang violet nga T-shirt, maong nga pants, kag puti nga tsinelas.
Ginabanta naga-edad 14 tubtob 16 anyos ang biktima kag blonde ang buhok.
Sa interview sang Bombo Radyo kay Patrolman Victorino Bunda III, imbestigador sang Estancia Municipal Police Station, iya ginpahayag nga may duha ka utod nga kawayan sa tupad sang lalaki.
Posible suno kay Bunda nga ginpulihan ukon ginbanggaan ang biktima, ginkastigo, ginkarga sa salakyan kag ginhal-id sa kahilamnan.
May sisi sa ibabaw sang kilay sang lalaki kag may mga lagob sa nawong.
Ginabanta 6-8 ka oras na sang natabo ang krimen antes nasapwan ang biktima.
Nagapadayon pa ang imbestigasyon.
