SAN JOSE DE BUENAVISTA, ANTIQUE – Nakuha na sang pamilya ang bangkay sang isa ka lalaki nga biktima sang ginapahayag summary execution kag nasapwan sa Brgy. Funda-Dalipe, San Jose De Buenavista, Antique.
Sa interview sang Bombo Radyo kay Police Major Benjo Clarite, hepe sang San Jose De Buenavista Muncipal Police Station, iya ginpahayag nga positibo nga ginkilala sang pamilya ang biktima nga si Jerry Bolivar sang Brgy. Bakhaw, Mandurriao, Iloilo City apang may mga himata sa Leganes, Iloilo.
Suno kay Clarite, wala pa sang tul-id nga identity tuhoy sa suspek apang may yara sang tatlo ka mga anggulo sa pagpatay sa biktima.
Ginpahayag ni Clarite nga lakip diri, amo ang personal nga kabuhi, trabaho bilang kontraktor kag ang background sa illegal drugs kun sa diin 12 ka tuig nga napreso sa New Bilibid Prison ang biktima.
Antes pa man nasapwan nga patay, ginapahayag nga nakalisensya pa si Bolivar sa iya pamilya nga magpadulong sa Passi City sa probinsya sang Iloilo.
Nahibaluan nga nakit-an ang bangkay ni Bolivar sa Brgy. Funda-Dalipe nga may yara sang mga pilas sa ulo kag lawas tuga sang pagluthang kag pagbuno.
