ILOILO CITY – Nagapabilin sa gihapon nga missing ang isa ka lalaki matapos ginapahayag gin-anod sang tubig sang nagtabok sa Siwaragan River sa San Joaquin, Iloilo.
Ang missing amo si Ronald Sealmoy, 20, residente sang Torocadan, San Joaquin, ginabanta 5’5″ ang kata-ason kag nagasuksok sang sweater nga puti, kag naka-jersey short nga gray.
Nagtabok ini sa suba sang Agosto 28.
Sa interview sang Bombo Radyo kay Police Captain Felix Perez, officer-in-charge sang San Joaquin Municipal Police Station, iya ginpahayag nga wala nasarangan ni Sealmoy ang kabaskugon sang tubig sang nagtabok sa suba rason nga gin-anod ini.
Suno kay Perez, indi man madalom ang suba apang mabaskog ang daludo sang tubig sang natabo ang insidente.
Pahayag niya, nagapadayon ang search and rescue operation sang Philippine Coast Guard upod ang Philippine National Police kag mga residente sang lugar.
