ILOILO CITY – Patay ang isa ka lalaki nga ginapahayag may deperensya sa paminsaron matapos nga nalumos sa Zone 3 Barangay San Juan, Molo, Iloilo City.
Ang biktima amo si Jenelle Surigao, 28, kag residente sang nasambit nga barangay.
Sa interview sang Bombo Radyo kay Police Staff Sergeant Revel Louie Paciente, imbestigador sang Molo Police Station, iya ginpahayag nga naglisensya ang biktima sa iya iloy nga magpaligo sa suba.
Suno kay Paciente, makapila ka beses nga ginsaway sang mga residente sa lugar ang biktima bangud nga nagalumpat ini sa taytay apang wala ini nagpati.
Sang ulihi, natalupangdan nalang nga nagapa-utaw-utaw na ang iya lawas.
Ang biktima ang may pilas malapit sa iya nga ilong nga posible nakabunggo sa mga matig-a nga bagay sa tubig.
Pahayag ni Paciente, ginpakamaayo na sang pamilya sang biktima nga indi na pagpa-idalom sa autopsy ang lawas sini bangud nga nagapati sila nga wala sang foul play nga natabo.
