Natukiban sang kapulisan nga may yara sang kasaysayan sang stroke kag heart attack ang isa ka lalaki nga ginbawain sang kabuhi matapos nag-check in sa lodging house sa Barangay Cochero, Molo, Iloilo City.
Sa interview sang Bombo Radyo Iloilo kay PCapt. Ryan Christ Inot, hepe sang Molo Police Station, iya ginapahayag na-stroke ang biktima nga gintunaan sang iya nga kamatayon.
Suno kay PCapt. Inot, base sa imbestigasyon sang kapulisan, ala-1:00 kaina sang kaagahon, nag-check in ang biktima nga ginkilala kay Alias Puting kag iya sini nga abyan sa lodge, kaupod ang ila tagsa ka partner.
Pahayag pa niya, lunsay ang mga ini yara sa impluwensya sang makahulubog nga ilimnon.
Pag-abot sang alas-2:00 sang kaagahon, naggwa ang mga babaye kag nagpabilin ang mag-abyan sa tagsa nila ka kwarto para magtulog.
Apang, pasado alas-5:00 sang aga, naglisensya ang upod ni Alias Puting nga mauna na ini sa ila ubrahan, apang wala na ini nagsabat kag nagasinyas nga nagasakit ang iya dughan.
Ginpahayag pa ni PCapt. Inot, ginhingaw pa nga gindala ang biktima sa hospital, apang ginbawain gid ini sang kabuhi.
Dugang pa, kumbinsido naman ang pamilya nga wala sang foul play nga natabo.
