Nakakita ka na sang tawo nga wala na sang tiyan, colon, rectum kag gallbladder pero buhi kag mapagsik gihapon?
Kilalahon ta ang 36 anyos nga si Juan Dual, ang lalaki nga masami naga-joke nga ‘I am empty inside’ pero ulihi lang nahibaluan nga matuod ang iya nga lahog kag literal ang buot silingon sini.
13 anyos pa lang si Juan sang nadiagnose nga may hereditary condition nga familial multiple polyposis; 99.8% ang tyansa nga mag-develop ang cancer sa iya nga digestive system.
Bangud sini, gin-operahan si Juan kag ginkuha ang iya colon kag rectum.
Sang nag-28 anyos si Juan, naapektuhan sang balatian pati ang iya tiyan rason nga ginkakas man ini apang diutayan lang siya mapatay bangud sa postoperative hemorrhage.
Halin sa 106 kilograms, nagnubo sa 57 kilograms ang bug-at ni Juan.
Ginsaysay ni Juan nga wala gid siya sang pwersa sang amo nga tion apang sang nagdugay na, nasarangan na niya nga ilakat-lakat ang ila nga ido kag sang ulihi, natukiban niya nga may kusog na siya nga butungon ang higot sang ido.
Amat-amat nga nakarecover si Juan paagi sa healthy diet kag masami nga pag-exercise.
Walo ka bulan ang nagligad matapos ang iya katapusan nga operasyon, nasarangan na ni Juan nga magjoin sa mga marathon kag nangin aktibo naman sa sports!
