ILOILO CITY – Naangot sa iligal nga droga ang lalaki nga ginluthang sa Brgy. Cuartero, Jaro, Iloilo City.
Ang biktima amo si Jerome Paegane, ginabanta 40 anyos ang edad, residente sang Brgy. Fajardo sa amo man nga distrito.
Sa exclusive interview sang Bombo Radyo kay Punong Barangay Ernando Leonor, iya ginpahayag nga ginakuno-kuno nga nagagamit sadto sang iligal nga droga si Paegane.
Apang wala ang pangalan ni Paegane sa Barangay Drug Abuse Council (BADAC).
Gin-athag man ni Leonor nga wala man sang malain nga rekord si Paegane bangod isa man ini ka maayo nga tawo sa ila barangay.
Samtang, gintuad naman sang mga residente sang Brgy. Cuartero, Jaro Iloilo City nga may nakita sila nga duha ka lalaki nga nagamotorsiklo nga nagapanilag sa lugar antes ang insidente.
Sa exclusive interview sang Bombo Radyo kay alyas Boy, iya ginpahayag nga kahapon may yara sang duha ka lalaki nga nagasuksok sang duag blue nga t-shirt kag may logo nga flash ukon kilat.
Suno kay Boy, ang ini nga mga lalaki ang nagalantaw sa mga Close Circuit Television (CCTV) camera nga natapik sa mga poste sa ila lugar.
Apang sang ila gin-usisa kun ano ang ila katuyuan sa ila lugar, wala ang mga ini nagsabat kag nagsakay sa ila motorsiklo.
