ILOILO CITY – Preso ang isa ka hubog nga lalaki matapos nga ginpakitaan sini sang armas ang babaye nga assistant sang Indian national matapos ginsukot sang iya utang sa Barangay Osmeña, Iloilo City Proper.
Ang arestado amo si alyas Jerry, tumandok sang Antique, apang temporaryo nga naga-istar sa nasambit nga lugar.
Sa interview sang Bombo Radyo kay Willy Banesio, pakaisa ni Jerry, iya ginpahayag nga duha ka beses na ini nga nag-utang sa Indian national.
Ang pinakaulihi sini nga utang ang nagadangat sa P5,000 sa diin kada adlaw, ginasukot ini sang P300 tubtob maimpasan.
Apang samtang naga-inom, ginsukot si alyas Jerry sang sekretarya, apang sa baylo nga magbayad, nagpakita ini sang iya nasukbit nga armas.
Gilayon naman nga nagpangayo sang bulig ang sekretarya sa traffic auxiliary kag ginpalab-ot ini sa pulis.
Nakuha naman sa posisyon sini ang revolver nga armas lima kag lima ka mga bala.
Sa subong, preso na si alyas Jerry sa Iloilo City Police Station 7 sa diin magapangatubang ini sang kaso nga paglapas sa Republic Act No. 10591 ukon Comprehensive Firearms and Ammunition Regulation Act kag Commission on Elections (COMELEC) gun ban.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗝𝗼𝗺𝗮𝗿 𝗩𝗶𝗹𝗹𝗮
