Gintuad sang saksi sa natabo nga shooting incident sa Brgy. Lanag, Sta. Barbara, Iloilo nga nagtuyo pa nga nagdalagan ang biktima agud nga luwason ang iya kaugalingon.
Ang biktima amo si Rodito Celis Jr., residente sang Omambog, Sta. Barbara; samtang ang suspek amo si Ronald Susvilla, 45-anyos residente sang Brgy. Dalid, Sta. Barbara.
Sa interview sang Bombo Radyo kay Manay Davila, nakakita sa krimen, iya ginpahayag nga nagasakay sa motorsiklo ang biktima samtang ginapaarakan lupok sang suspek.
Suno kay Davila, gilayon nga natumba ang biktima lakip na ang ginamaneho sini nga motor, nagbangon, kag nagtuyo pa nga magpanginluwas.
Natumba man ang suspek tubtob nga sila ang naglagsanay duha sang biktima.
Nag-agum sang igo sang bala ang biktima sa ilok, sa iya liog, samtang tatlo naman ka igo sa tiyan, isa sa iya alatrasan kag amo man sa likod sang iya lawas.
