Ginkumpirma sang barangay official kag himata nga guwa-sulod sa presuhan ang isa ka lalaki nga ginsulod sa sako, ginhal-id, kag nasapwan nga naga-utaw utaw sa Parola area sa Barangay Concepcion, Iloilo City Proper.
Ang biktima amo si Raymond Castro, residente sang Barangay Simon Ledesma, Jaro, Iloilo City, nga una nga nakilala bangud sa “Rosmar” nga tattoo sa iya nga likod.
Yara na sa advanced state of decomposition ang bangkay sang nasapwan ini kagab-i.
Sa interview sang Bombo Radyo kay Barangay Kagawad Arnel Ledesma sang Desamparados, Jaro nga tiyo sang biktima, iya ginpahayag nga may daan nga rekord sa iligal nga droga kag pagpangawat ang iya nga hinablos.
Antes ang insidente, ginpahayag nga wala man ini sang nasugid nga death threats. Apang suno sa barangay kagawad, sang Huwebes, Mayo 11 sang kaagahon sang gin-pick up si Castro sang wala pa nakilal-an nga mga lalaki kag ginpasakay sa isa ka puti nga sports utility vehicle.
Lakip man sa gin-agbayan kag gindala sa amo nga salakyan amo si Alias Bulag nga kaupod ni Castro sang amo nga tion.
Tubtub subong, missing si Alias Bulag.
Nagapadayon man ang imbestigasyon sang mga pulis. #
