Gindala sa Calinog Municipal Police Station ang lalaki nga nagsulod kag nag-intra sa disco sang closing event sang Provincial Boy Scout of the Philippines (BSP) Jamboree sa Calinog, Iloilo.
Sa interview sang Bombo Radyo kay Police Major Myles Dieron,hepe sang Calinog Municipal Police Station, iya ginpahayag nga nakasulod ang lalaki matapos nga wala matalupangdan sang kapulisan nga isa ini ka outsider bangud naga-anggid ang iya ginasuksok nga uniform sa mga staff kag mga manunudlo sa sulod sang campsite.
Suno kay Dieron, gindesisyonan na lang nga dal-on ini sa police station bangud indi na ma-settle ang reklamo sang menor-de-edad matapos ini nga nasalapay sa abaga sang nasambit man nga lalaki.
Nagpangayo man sang pasensya ang indibidwal kag nagpaathag nga indi niya tuyo ang natabo bangud nga nakainom ini sang makahulunog nga ilimnon.
