Dead-on-arrival sa hospital ang isa ka lalaki matapos nga natirohan samtang nagalakat ini pauli sa Barangay Lopez Jaena Norte, La Paz, Iloilo City.
Ang biktima amo si Antonio “Boy-boy” Baybayanon, 26-anyos, may live-in partner, residente sang nasambit nga lugar.
Sa interview sang Bombo Radyo Iloilo kay Punong Barangay Relendes Soberano, iya ginpahayag nga antes natabo ang insidente, may nakit-an nga naka-standby nga motorsiklo sa lugar nga amo gingamit sang suspek sa paghimo sang krimen.
Suno kay Soberano, gilayon nga nagpadulong sa Gustilo, La Paz ang suspek agud nga magpalagyo.
Nag-agum naman sang pilas sa ulo kag liug ang biktima nga nangin rason sang iya nga kamatayon.
Gintuad naman sang himata sang biktima nga nakasuksok sang jacket kag naka-facemask nga duag itom ang suspek samtang ini ang sakay sa motorsiklo.
Nahibaluan nga mabakal lang kontani sang sigarilyo ang biktima sa tyangge, apang wala na ini nakapauli kasunod sang insidente.
