Isa ka lalaki sa Colombia nga masami ginaigo sang kilat ang nagdesisyon nga ilubong ang iya kaugalingon sa duta agud indi na siya maigo liwat.
Nagkutkot si Alexander Mandon sang buho tubtob sa iya liog ang kataason, gintabunan niya ang iya kaugalingon kag ang iya lang ulo ang nagguwa.
Ang iya lawas yara sa idalom sang duta sa sulod sang pila ka oras.
Si Alexander isa ka soldado kag ginasuspetsahan nga may yara sang makatilingala nga kondisyon sa lawas nga nagahimo sa iya nga madali siya nga maigo sang kilat.
Ang iya pinakaulihi nga inagihan amo ang pinakamabaskog bangud sa isa ka adlaw, makaduha siya nga naigo sang kilat.
Ang una nga pag-igo sa iya sang kilat ang yara siya sa sulod sang isa ka kampo kag sa maayo nga palad, wala man sang may natabo sa iya. Apang ang iya mga opisyales sa militar nahadlok nga basi mahalitan ang mga kaupod gani nagdesisyon sila nga siya ang pabakasyunon anay.
Sang pagpauli niya, naigo siya liwat sang kilat.
Paralisado siya kag indi na makalakat bangud sang pag-igo sang kilat sa iya.
Pila ka adlaw, nagpakonsulta siya sa doktor sa ila lugar kag ginlaygayan siya sang doktor nga ilubong ang iya kaugalingon sa duta apang kinahanglan nga tubtob ini sa iya liog bangud suno sa iya doctor, ang higko sa duta amo ang magasuyop sang mga electrical charges sa lawas ni Alexander.
Matapos malubong ang iya kaugalingon, ginpahayag nga nakabatyag siya sang kaumpawan kag wala na sang report pa nga ginaigo siya liwat sang kilat.
