ILOILO CITY – Nagpositibo sa COVID-19 ang isa ka lalaki nga lakip sa nabun-an sang natabo ang rambol sa Sunburst Park sa Iloilo City Proper sang nagligad nga semana.
Sa interview sang Bombo Radyo kay Shellane Nabos, residente sang Barangay Rizal Estanzuela, Iloilo City Proper kag utod sang ginatumod nga lalaki, iya ginpahayag nga nagapabilin nga palaligban sa ila pamilya kun ngaa nainfect pa sang virus ang iya 24-anyos nga utod.
Nagapanindugan si Nabos nga indi miyembro sang gang ang iya nga manghod.Suno sa natungdan, bag-o lang gid napatay ang ila nga amay kag bangud sang natabo sa ila pamilya, masami lang nagapabilin ang ila nga manghod sa ila nga balay.
Magluwas diri, bugtot pa ini suno sa iya, mabuot, kag wala sang ginahimo nga kalakasan sa iban nga tawo.
Sang gab-i nga natabo ang rambol, nahagadan lang ang iya nga utod sang ila man nga himata agud maglantaw sang Christmas lights sa Sunburst park.
Si alyas Elmo sang Barangay Lanit, Jaro, Iloilo City ang ginatudlo nga nagbuno sa biktima.
Nagalain ang buot sang pamilya bangud magluwas nga bugtot ang iya nga manghod, nabun-an pa ini sa dughan rason nga nabudlayan ini nga magginhawa, kag subong na-infect pa sang COVID-19.
Ginaistoryahan pa sang pamilya kun mapasaka sila sang kaso batok sa suspek.
