Makapila gid kita ka beses nga ginahambalan nga kontrolon ang aton kaugalingon kun kita ang maakig bangud posible nga indi man naton maluyagan ang resulta sang aton sarang nga mahimo kun magtahaw na ang aton nga nabatyagan.
Importante ini nga leksyon nga aton tun-an samtang bata pa kita.
Isa ka halimbawa diri amo ang isa ka 28-anyos nga lalaki sa China nga nag-tinir sa isa 4-star hotel sa amo nga pungsod.
Suno sa mga pulis, naka-bais sang amo nga lalaki nga si Chen ang isa ka hotel staff bangud samtang yara siya sa amo nga hotel, nadula ang iya laptop.
Wala gid naghaum ang staff sang sunod nga ginhimo ni Chen.
Ginpasulod sini sa lobby sang hotel ang iya puti nga car kag ginpangbungguan ang kutob sang iya nga malabayan — dala dira ang glass doors, lamesa, kag tanan nga yara sa lobby bangud hungod sini nga ginpakadto-pabalik ang salakyan.
Naglibog naman ang ulo sang iban nga guests kun ano ang natabo kun ngaa nag-wild ang lalaki.
Ginbungguan pa sini ang iban pa gid nga glass doors sang buot na gid man nga maguwa sa hotel, apang nakabunggo sa door frame rason nga nag-flash na ang hazard lights kag nagpundo.
Nakit-an man ang iban nga lalaki nga akig kag ginpanglampusan ang salakyan ni Chen.
Suno sa pulis, wala man sang napilasan sa amo nga insidente, apang syempre, bilang premyo, gin-detain si Chen samtang pending ang imbestigasyon.
Sang ulihi, natukiban nga ginkawat gali ang iya nga laptop kag nakit-an nga yara na sa guwa sang hotel.
Antes sini nga insidente, suno sa isa ka booking website, nakaangkon ang amo nga 4-star hotel sang “very good” reviews halin sa mga guests nga nagtinir didto. ##
