Nakaagi ka na bala nga nagdabok sang basura, apang sang naglapta ang kalayo, nagsala-sala ka na kun paano mo ini mapatay sa kahadlok nga basi kun masunog pati ang inyo balay?
Ano pa gid abi ang imo palak kun halimbawa ikaw ang gintunaan sang isa ka wildfire?
Natabo ini sa isa ka lalaki sa western Colorado, U.S.A.
Isa ka adlaw, nagguwa ang lalaki kag ginsunog ang bangkay sang iya nga ido.
Base sa record sang korte, sang ginhaboy na sang lalaki ang spray can sa kalayo, naglupok ini, naglapta ang kalayo sa kahoy nga ingod sini, nagdaku ang sunog, naglapta kag nahimo nga wildfire!
Ang nasunog amo ang 28-square-kilometer private property, isa ka balay, kag ang halit nga natuga sini ang nagdangat sa $200,000 ukon ginabanta nga P11 million.
Nakilala ang lalaki bangud sang gin-report sa pulis ang wildfire, nakit-an pa ini nga naghalin sa lugar sang sunog kag nagagamit ini sang salakyan.
Nagapuyo man ang amo nga lalaki sa isa ka camper van nga malapit lang sa gintabuan sang sunog.
Nakit-an man sang mga imbestigador nga may mga tul-an sang ido sa lugar kag may yara sang nakasulat sa bato nga “Oct. 2017 – July 2024, Rocket Dog, Rest In Peace Buddy.”
Ini amo ang ginatudlo nga lulubngan kuntani sang ido nga si Rocket.
Arestado na subong ang amo nga lalaki kag natalana nga kasuhan sang arson kag trespassing kasunod sang resulta sang pagpangusida sang wildfire investigators.#
