Patay ang isa kag lalaki matapos gintiro samtang ginakuhaan sang video ang isa ka komosyon sa isa ka solar farm sa General Tinio, Nueva Ecija.
Nag-ugat ang insidente bangud lang sa reklamo sa mapangsot nga banyo sa lugar.
Ang biktima, nga nagaserbe nga installer sang solar panels, ang naigo sang bala sa tiyan kag batiis samtang naga-record sang komprontasyon sa tunga sang iya nga grupo kag sang grupo sang suspek nga mga subcontractor sa proyekto.
Sa tunga sang ginamo, nabatian pa sa video ang pagsinggit sang biktima nga nagapangayo sang bulig nga dal-on siya sa ospital matapos natiruhan.
Nadala pa ini sa ospital sa General Tinio, apang ginbawian sang kabuhi samtang ginasaylo sa ospital sa Cabanatuan City.
Suno kay General Tinio Police Chief Shariel Paulino, nagagwa sa imbestigasyon kag pahayag sang mga testigo nga ang grupo sang biktima ang una nga nagpalapit kag nagsita sa grupo sang suspek, nga nagtuga sang kakulba sa bahin sang suspek gani nagkuha ini sang pusil.
Matapos ang pagpangluthang, madasig nga nalagyo ang suspek gamit ang isa ka pickup vehicle.
Padayon pa ang manhunt operation sang kapulisan sa suspek nga mangatubang sang kaso nga murder.
