ILOILO – Patay ang isa ka lalaki matapos ginbuno samtang nagapahuway sa isa ka waiting shed sa Brgy. Mandong, Janiuay, Iloilo.
Ang biktima amo si Jose Glen Vincent Barranco, 47 anyos, kag residente sang Brgy. Abangay, Janiuay.
Ang suspek naman amo si Leo Arca, residente sang Brgy. Mangil, Janiuay.
Sa interview sang Bombo Radyo kay Police Corporal Pio Estampador, imbestigador sang Janiuay Municipal Police Station, iya ginpahayag nga nagikan pa sa Oton ang biktima, apang bangud nakainom kag nakapoy sa byahe, nagpundo ini kag nagpahuway sa amo nga waiting shed sa higad sang karsada.
Samtang, ang suspek naman nga si Arca ang naakig bangud nga nabakulan ini sa isa ka namatyan sa amo man nga barangay.
Dugang pa ni Estampador, santo sa pahayag sang mga testigo, antes pa man naghalin sa namatyan si Arca, nagpaandam na ini nga patyon niya ang kun sin-o man nga maagyan niya sa dalan.
Nakapauli na si Arca sa ila balay kag nagdesisyon nga magbalik sa namatyan bangud ginapahayag nga mabalos ini sa nagsakit sa iya kag natabuan man nga naagyan niya si Barranco nga nagakatulog sa waiting shed.
Ginbuno ni Arca si Barranco sa iya dughan gamit ang ginabanta walo tubtob siyam ka pulgada nga kutsilyo.
Gilayon man nga nadakpan ang suspek kag yara subong sa Janiuay Municipal Police Station.
Nahibaluan nga naga-guwa sulod man sa presuhan si Arca bangud may kaso man ini nga robbery kag illegal gambling.
