Gindala sa police station ang isa ka ka lalaki nga nang-agaw sang armas sang isa ka security guard sa Coffee Break sa General Luna Street, City Proper subong nga gab-i, Agusto 6.
Ang lalaki amo alias John, 28-anyos, residente sang Dela Rama, City Proper.
Nag-ako mismo si alias John nga gin-agaw niya ang pusil bilang depensa sa iya kaugalingon kag agud wala sang may matabo sa iya asawa nga kaupod niya sang amo nga tion.
Pahayag sini, nagapangayo lang sila sang kwarta agud nga may ibakal sang pagkaon.
“Ang gwardya nga naka-sibilyan, naglibot sa likod, ginkuhaan ya kami sang kahon. Pagbukas ya sang kahon, nakita ko nga pusil. Wala na ko nagduha-duha, gindepensahan ko kaugalingon para indi ko matiruhan kag indi maigu ang asawa ko. Gabusong asawa ko,” suno kay alias John samtang nagahilibion.
Pahayag pa sini, wala man naglupok ang pusil nga iya gin-agaw.
“Ang sa pihak nga gwardya, sa pihak nga duty, naka-uniform, siya ang nagpalupok sa amon,” dugang pa ni alias John.
Gin-alegar man sini nga ang naka-sibilyan nga gwardya ang nagtaya sa ila sang pusil.
“Gindepensahan ko kaugalingon namon,” sabat niya sang ginpamangkot kun ngaa nakalab-ot ang insidente sa pagpukutay kag pagpang-agaw sang pusil.
Ginpanginwala man sini nga nagabalik-balik sila sa amo nga establisyemento.
“Bag-o lang kami da nangayo,” suno sa iya. “Wala kami gapasaway, wala kami gapinadungol.”
𝗣𝗔𝗛𝗔𝗬𝗔𝗚 𝗦𝗔𝗡𝗚 𝗦𝗘𝗖𝗨𝗥𝗜𝗧𝗬 𝗚𝗨𝗔𝗥𝗗
Nanginwala naman ang security guard nga nangtaya siya sang armas kay alias John.
Sa interview sang Bombo Radyo sa gwardiya, iya ginpahayag nga naka-sibilyan siya bangud breaktime nila sang amo nga tion.
“Wala ko kataya sa iya,” suno sa gwardya.
Ginapahayag nga nagpasalba naman ang isa pa ka security guard nga nakakita sa hitabo rason nga may nabatian nga lupok ang mga nakalabay sa amo nga lugar.
Baliskad sa alegasyon ni alias John nga bag-uhan lang sila sa pagpakilimos sa Coffee Break, gin-alegar naman sang guard nga nagabalik-balik ang mga ini kag masami nila nga ginasaway.
Wala sang may napilasan sa insidente.
Tanan sila ang gindala sa Iloilo City Police Station 7 para sa imbestigasyon sang kapulisan.
