Sampaw-sampaw nga reklamo ang atubangon sang isa ka 33-anyos nga lalaki matapos ini nanghangkat sang away kag nag-spray pa sang gasolina sa isa ka gas station.
Natabo ini sa Barangay Poblacion Ward 2 sa Minglanilla, Cebu nga nakuhaan pa sang closed circuit television (CCTV).
Aga pa sang nagkadto ang lalaki nga si Mamerto Reyes Pandola III sa gas station, kag gin-alegar nga agresibo na nga daan, kag naghangkat gilayon sang tapungulay.
Isa sa iya ginhangkat amo ang operations manager sang gasolinahan nga iya man lang kasilingan.
Sunod sini nga ginkuha ang fuel hose kag didto na kag gin-spray sini ang gasolina sa palibot.
May ginkuha man ini nga botelya, kag sa kahadlok sang mga empleyado nga maglala pa ang iya himuon, gintawag ang pulis.
Naglab-ot sa masobra P2,000 ang balor sang gasolina nga gin-usik sang lalaki.
Gintinguhaan man sini nga magwaras sang nag-abot ang otoridad apang wala na ini sang nahimo sang ginposasan.
Sang yara na sa custodial facility, ginsiling sini nga indi na niya madumduman kun ano ang iya ginhimo. Nagdepensa man siya nga indi siya hubog kag wala man suno sa iya nagagamit sang iligal nga droga.
Lakip sa iya atubangon amo ang reklamo nga alarm and scandal, resistance and disobedience to person in authority, kag malicious mischief.
