Nag-angkon sang pilas sa kamot ang isa ka lalaki nga nagapanilhig sang hinali lang nga ginlabo ini sang iya kasilingan sa Dulonan, Arevalo, Iloilo City.
Ang biktima amo si alyas Jose, 56 anyos samtang ang suspek amo si alyas Ed kag lunsay residente sang nasambit nga lugar.
Suno sa imbestigasyon sang otoridad, nagapanilhig ang biktima kag may ginaistorya ini sa cellphone sang nagpalapit ang suspek kag ginlabo ini.
Sa maayo nga palad, nakabalikid ang biktima kag nasagang ang hinganiban gamit ang iya kamot.
Nagbiya man si alyas Ed suspek kag nagpangayo sang bulig sa Arevalo PNP ang biktima.
Sang ila ginpadulungan ang suspek, nagbato pa ini sa kapulisan apang natigayon nga maaresto.
Ginpahayag sang biktima nga indi man niya kilala ang suspek kag wala man sila sang daan nga hiligut-anon.
Ginaalegar nga may yara sang problema sa paminsaron ang suspek nga nakahunong na man subong sa Arevalo PNP.
Ginahitso naman ang kaso nga ipasaka batok sa suspek.
