Wala sang paghinulsul ang suspek sa iya pagbuno sa iya lang man pakaisa sa Barangay Nabitasan, La Paz, Iloilo City.
Ang biktima amo si Audy Legazpi, 42 anyos samtang ang suspek naman amo si Edelberto Valenzona alias Topak, 45, lunsay residente sang amo nga lugar.
Sa interview sang Bombo Radyo kay Valenzona, iya ginpahayag nga madugay na niya ginadumtan ang iya pakaisa bangud una siya nga ginlabu sini sang Enero.
Ginsaysay man sang suspek nga samtang nagakatulog kag hubog ang iya nga pakaisa, ginbuno niya ini sa tiyan gamit ang balisong nga may kalabaun nga 6 ka pulgada.
Suno sa iya, madugay na nga may away sila sang iya pakaisa humalin pa sang 2012 bangud indi luyag sini nga mag-upod sila sa isa ka balay.
Pahayag naman sang La Paz PNP nga masami ireklamo ang suspek bangud sa mga alegasyon nga may sakit ini sa paminsaron.
Sa subong, preso sa La Paz Police Station ang suspek kag padayon naman nga ginabulong sa ospital ang biktima.
