ILOILO CITY – Ginpasakaan na sang kaso ang isa ka lalaki bangud sang paglapas sang kalinong matapos nga ginpakahuy-an sa publiko si Prince Andrew nga isa sa mga anak sang nagtaliwan nga si Queen Elizabeth II samtang nga nagalakat ini sa ingod sang lungon sang iya iloy sa ginpatigayon nga solemn procession sa Edinburgh.
Apisar sang pagpakita sang kasubo sang publiko sa kamatayon sang reyna, may yara sa gihapon sang pila ka mga indibidwal nga gin-aresto bangud sang pagprotesta.
Suno sa spokesperson sang Scotland Police, isa ka 22 anyos nga lalaki ang gin-aresto kag ginpasakaan sang kaso may kaangtanan sa paglapas sa kalinong sa Royal Mile.
Base sa footage, makita ang isa ka lalaki nga nagasinggit kay Prince Andrew sang nagalakat ang prinsipe kag ang iya mga utod lakip na si King Charles III sa ingod sang lungon sang ila iloy.
Suno sa lalaki, ang mga powerful nga lalaki ang dapat nga indi pagpahanugutan nga magkomiter sang sexual crimes kag gilayon nga ma-abswelto.
Ang 62 anyos nga prinsipe ang nagpanaog nagikan sa iya royal duties sang 2019 matapos ang pagpakig-abyan sa isa ka US financier kag sex offender nga si Jeffrey Epstein nga gilayon man nga naghikog samtang nga nagahulat sang trial sa sex trafficking charges batuk sa iya.
Sang Pebrero subong nga tuig, gin-settle ni Andrew ang isa ka kaso sa isa ka biktima ni Epstein nga nag-akusar sa prinsipe nga nag-abuso sa iya sang siya ang teenager pa lamang.
Ginpanginwala ni Andrew ang amo nga kasal-anan kag wala ini nakasuhan sang bisan ano nga criminal offense.
Nahibaluan nga ginatos ka libo nga mga mourners ang nagtipon sa mga lugar nga konektado sa royal family sa London kag sa Scotland kun sa diin ang reyna ang napatay sa Balmoral Estate.
Kalabanan sa ila ang nagpakita sang ila respeto kag kasubo apang ang magamay nga numero sang protesters ang na-cover sang media nga nagresulta sa komento sa social media may kaangtanan sa police response.
Suno sa spokesperson ni Prime Minister Liz Truss, indi na siya magkomento sa operational policing decisions apang ginpahayag niya nga ang kinamatarong sa pagprotesta ang nagapabilin nga fundamental principle.
