Patay ang isa ka 21-anyos nga lalaki matapos nabun-an sang nagatambag kuntani sa away sa baylehan kadungan sang bisperas sang pista sa Barangay Baybay, San Joaquin, Iloilo.
Ang biktima amo si alias Carlo, residente sang amo man nga barangay.
Sa interview sang Bombo Radyo kay Police Captain Isagani Tabares, hepe sang San Joaquin Municipal Police Station, iya ginpahayag nga may duha ka grupo nga nag-inaway kag sang nagpatunga man si alias Carlo agud magtambag, nabun-an ini sa wala nga bahin sang dughan.
Gin-identify ang mga suspek nga sanday Alias Jonel, 29, kag alias Renel, 24, ginapahayag lunsay nagsumbag sa biktima.
Ang nagbuno naman suno sa hepe amo si alias Francis, 27-anyos.
Suno pa kay Tabares, arestado na ang tatlo kag natalana nga pasakaan sang murder complaint.
Na-recover man sa crime scene ang duha ka kutsilyo nga nagalaba sang 21 cm kag 31 cm.
Sa ginpadala nga video sa Bombo Radyo Iloilo, nakit-an nga sang nag-responde na ang pulis, na-atrasan pa sini ang mga tawo nga nagatuwang sa lawas sang biktima.
“Isa lang ka salakyan ang makaagi to [sa area sa basketball court]. Wala man totally naatrasan ah. Medyo malapit lang sa aton nga biktima,” pahayag sang pulis.
