Padayon pa nga ginapangita sang kapulisan ang isa ka lalaki nga amo ang nagtiro sa isa ka personnel sang Tigbauan Municipal Police Station nga nagpara kag nagpadulog kuntani sa motorsiklo nga may sakay nga tatlo ka mga tawo nga lunsay wala sang mga helmet.
Ang personnel amo si Police Staff Sergeant Jeffrey Biña Talaver, 39, nga residente man sang Tigbauan.
Sa interview sang Bombo Radyo kay Police Captain Alfred Mansoy, hepe sang Tigbauan Municipal Police Station, iya ginpahayag nga natabo ang insidente sang Huwebes, pasado alas syete sang gab-i, samtang yara sa regular duty si Talaver sa Brgy. 2, Poblacion kag gin-flagdown ang motor nga may sakay nga tatlo ka mag-ulutod nga lalaki.
Nakit-an nga wala sang mga helmet ang tatlo ka sakay sini nga isa ka paglapas sa ordinansa sang banwa.
Wala nagdulog ang motor, gani nga naglagas ang mga police personnel kun sa diin nauna si Talaver nga nakasakay man sa motorsiklo.
Suno sa hepe, natumba ang motor sang mga suspek, kag antes sila nagpadayon sa pagpalagyo, nagpalupok si alias Dagol kay Talaver gamit ang ginapatihan nga .38 revolver.
Sa maayo nga palad, sa holster nag-igo ang bala, wala naglapos, apang nabali gid ang trigger sang service firearm ni Talaver rason nga wala na nag-function.
Nadakpan ang menor de edad nga utod nga si Alias Alvin; samtang si alias Mac-Mac naman nga amo ang naga-drive sang motorsiklo ang nakapalagyo apang sang ulihi ginsungka man sang ila nga amay.
Pahayag sang hepe, si alias Dagol na lang ang ginapangita subong. Ginakabig ini nga armed and dangerous bangud yara pa sa iya nga paghinakop ang iya nga armas.
Nagdepensa ang mga utod sini nga wala sila sang ihibalo nga may dala nga armas si Dagol; kag sang nagpalupok ini, nagsala man sila rason nga nagpalagyo.
Base sa pagpangusisa sang kapulisan, involved anay si Dagol sa isa ka hacking incident sa Igbaras. Ginpahayag nga tumandok gid sang Tubungan ang ila pamilya.
Nagapakig-angot naman ang Tigbauan Police sa pamilya sang lalaki agud nga mabuligan sila nga mapasungka ini sa awtoridad kasunod sang hitabo.
