Batad, Iloilo – Patay ang isa ka lalaki matapos ginluthang sang tag-iya sang balay nga nga iya tuyo kuntani nga kawatan sa Brgy. Alapasco, Batad, Iloilo.
Ang naluthangan amo si Juv Buendia Bigare, 20, residente sang nasambit nga lugar.
Ang nakaluthang amo si Marlo Chavez Sr. alyas “Dodong”, 45.
Sa interview sang Bombo Radyo kay Police Staff Sergeant Francis Jan Aricaya, imbestigador sang Batad Municipal Police Station, iya ginpahayag nga nabatian ni Chavez nga ginaguba ni Bigare ang pirtahan sang ila balay.
Suno kay Aricaya, sang ginbuksan ni Chavez ang pirtaha, gilayon sini nga ginluthang sa Bigare sa dugaahan.
Gindala pa ini sa ospital, apang gindeklarar sang doktor nga dead on arrival.
Nagsungka naman si Chavez sa mga otoridad dala ang iya homemade shotgun.
Sa subong, preso na ini sa Batad Municipal Police Station.
Ginatun-an naman sang pamilya ni Bigare kun bala magapasaka sila sang kaso batok kay Chavez.
