ILOILO CITY – Preso ang isa ka lalaki nga gina-alegar nagtuyo nga magkawat sang motorsiklo nga ginapanag-iyahan sang isa ka green guard sa Esplanade 6, General Luna St., Brgy. San Agustin, Iloilo City.
Ang arestado amo si John Rey Galve, 25, residente sang San Felix, Iloilo City.
Ang tag-iya naman sang motor amo si John Paul Confesor, 28, residente sang Brgy. Muelle Loney, City Proper.
Sa report sang Iloilo City Police Office, ginpahayag nga sang kaagahon, gin-park ni Confessor ang iya nga motor sa likod sang isa ka pumping station sa Esplanade 6 antes ini nag-roving kaupod sa isa pa ka green guard.
Sang nagbalik na sa amo nga area, ginpahayag nga nadakpan gid ang suspek nga ginaguyod ang motor kag ginabanta 30 metros na ang kalayuon sa lugar nga ginbilinan sini.
Sang ginpatigayon ang body search, na-recover sa suspek ang isa ka kutsilyo, key chain, gunting, kag nanari-sari nga lyabe nga ginapatihan ginagamit sini sa pagpangawat.
Natalana nga ipasaka ang kaso suno sa ICPO. ##
