ANILAO, ILOILO – Padayon pa nga ginabulong ang apat ka mga pilason matapos nga gin-igo sang kilat sa Sitio Lu-awan Barangay San Carlos, Anilao, Iloilo.
Kun balik-balikan, isa ang napatay sa insidente.
Ang napatay amo si Rey Velarde, 47, residente sang Sitio Sambag, Barangay Nueva Sevilla, Btac.Viejo, Iloilo kag ginaalegar naigo sang kilat sa ulo nga gintunaan sang iya kamatayon.
Samtang, ang mga pilason naman amo sanday Lorenze Daquiado, 31; Laurence Daquiado, 27; John Paul Taldelore, 24; kag alyas “Sam” nga naga-edad sang 7-anyos.
Sa interview sang Bombo Radyo kay Police Staff Sergeant Rechie Bretaña, imbestigador sang Anilao Municipal Police Station, iya ginpahayag nga ululupod ang mga biktima sa payag kag naga-inom inom.
Suno kay Bretaña, bangud ang payag ang nahamtang sa pinakamataas nga bahin sa lugar, madasig ini nga nakaganyat sang kilat sa diin, isa gid ka haligi sang balay ang narumpag.
Ginapahayag dugang sang natungdan nga ang tatlo ka iban pa nga napilasan ang nakabatyag sang pagpalaminhod sang lawas, samtang ang menor ang nagareklamo sang pagpalanakit sang tiyan.
