ILOILO CITY-Pagtimalos sa ginakabig ‘baldog’ nga abyan ang motibo sang tag-iya sang furniture shop nga nadakpan sang otoridad nga may dala nga duha ka granada, .38 nga armas kag kutsilyo sa Bangga Bante, Zarraga, Iloilo.
Sa interview sang Bombo Radyo kay Marlyn Parreño, asawa sang suspek nga si Rey Parreño sang Bongco, Pototan, Iloilo, iya ginpahayag nga may ginkontrata ang iya bana nga balaklon nga mga kahoy nga sila man ang nagpang-utod sa Barotac Nuevo, Iloilo apang ginbaldog sang iya abyan nga si certain Michael nga taga- Dingle nga amo ang nangita sang buyer sang mga kahoy.
Suno kay Mrs. Parreño, tuman ang kaugot sang iya bana sa ginhimo sang abyan nga si Michael rason nga ginplano niya nga kadtuan ini agud balusan nga may dala nga granada kag mga armas.
Wala naman sang ihibalo ang asawa kon paano nakaangkon ang iya bana sang nasambit nga mga hinganiban kag eksplosibo.
Daw indi naman mabaton sang asawa nga napreso ang iya bana bangud mabuot man ini kag nadala gid lamang sang iya kaakig.
Ginpasakaan na sang sampaw- sampaw nga kaso si Parreño nga ginalakipan sang paglapas sa Republic Act 10591 ukon illegal posession of firearms, paglapas sa Republic Act 9516 ukon illegal possession of explosives, kag paglapas sa Batas Pambansa #6 ukon illegal possession of bladed weapons.
