Gintiro-patay sang awtoridad ang isa ka 27-anyos nga lalaki matapos nagpangluthang ini sa law enforcement officers sa Border Patrol facility sa McAllen, Texas, Estados Unidos sang Amerika.
Suno sa Department of Homeland Security, natumod ang suspek nga si Ryan Luis Mosqueda nga konektado sa isa ka address sa Michigan.
Suno sa ahensya, nagpalupok si Mosqueda sang yara ini sa entrada sang US Border Patrol sector annex rason nga nagbalos man palupok ang Border Patrol agents kag local police.
Antes napatay ang suspek, natiruhan man sini ang duha ka mga officer kag isa ka empleyado sang Border Patrol nga subong lunsay yara sa ospital.
Dala sang suspek sang nag-atake ini ang isa ka rifle kag may lain pa gid nga pusil kag assaultive weapons sa iya nga salakyan. Nakit-an sa salakyan sini nga may naka-spray paint nga mga tinaga nga “Cordis Die” nga makit-an man sa “Call of Duty” video game.
Natabo ang shooting nga ini matapos ang pila na ka serye sang bayolente nga mga insidente sa federal immigration facilities sa tunga nga nagasaka nga mga tensyon sa US nga naangot sa immigration enforcement policies sang Trump administration.
