Ka-Bombo, sensitibo ang kaundan sang masunod nga balita…
Bag-o lang tapos dul-ong sang iya bata sa eskwelahan ang biktima nga nawasak ang ulo kahapon sang aga matapos nalapakan sang isa ka Wing Van sa dalan nga sakop sang Brgy. Tacas, Jaro, Iloilo City.
Ang biktima ginkilala kay Stephen Jongco, 27 anyos kag isa ka laborer.
Sa interview sang Bombo Radyo kay Punong Barangay Joseph Poral sang Brgy. Tacas, Jaro, Iloilo City, iya ginpahayag nga magapauli kuntani ang biktima sa ila balay sa Zone 4 Brgy. Tacas, Jaro, sang nasag-idan sini ang isa ka motor rason nga natumba ini kag nagtupa sa idalom sang truck.
Suno sa traffic investigator medyo madasig ang pagpadalagan sang biktima rason nga natumba ini sa porsyon sang dalan kun sa diin suno kay PB Poral accident prone area.
Ginpahayag man sini nga ang suspek nga nakabunggo-patay sa biktima ang nagapauli man sa iya barangay sa Tacas Jaro.
Sa karon, nadesisyunan sang pamilya nga indi na lang magpasaka sang kaso batok sa suspek apang kinahanglan sini nga buligan sa pagpalubong ang biktima amo man ang pagbayad sa nabilin nga balayran sa ospital.
Nagpahanumdum naman si Punong barangay Poral sa mga motorista nga nagalabay sa nasambit nga lugar nga maghinay-hinay gid agud indi na maliwan ang kaangay nga aksidente kun sa diin nag-utas gid ini sang kabuhi.
