Wala pa nakilal-an ang lalaki nga nasapwan nga nagalutaw kag wala na sang kabuhi sa baybay sang Zone 1-A sa Barangay San Juan, Molo, Iloilo City.
Sa interview sang Bombo Radyo kay alyas Toto, manugpangisda, iya ginpahayag nga nagapamunit sila sa nasambit nga baybay sang nakit-an nila nga may bayo nga nagalutaw.
Suno kay Toto, diri kag natalupangdan nila nga lawas sang tawo ang nagalutaw sa diin gintinguhaan nila ini nga mapahigad.
Ginabanta 30 anyos ang edad sang lalaki kag may mga tattoo ini sa tuo nga kamot.
Samtang, padayon pa ang imbestigasyon sang mga pulis may kaangtanan sa matuod nga identity sang lalaki nga nasapwan patay.
Sa interview sang Bombo Radyo kay Police Executive Master Sergeant (PEMS) Cesar Salcedo, imbestigador sang Molo Police Station, iya ginpahayag nga posible gin-anod ang lalaki halin sa lain nga lugar.
Suno kay Salcedo, nagabukal na ang baba sang biktima sang nasapwan kag wala man ini sang mga pilas sa lawas.
Nagapanawagan naman ang pulis sa publiko nga makig-angot lang sa Molo Police Station kun may kakilala ukon himata nga lalaki nga ginabanta naga-edad 30 anyos pasaka kag na-missing ukon nadula.
