Natukiban sang Iloilo City Police Station 1 nga masami nagapadulong sa Iloilo City ang lalaki nga nasapwan nga nakasulod sa sa sako sa Parola Wharf sa tion sang Dinagyang Festival 2025.
Ang nasapwan amo si Angelo Brandon Salazar, may live-in partner, may duha ka mga kabataan kag residente sang Barangay 2, San Jose, Antique.
Sa interview sang Bombo Radyo kay Police Lieutenant Romelo Tabuyoc, Chief of Police sang Iloilo City Police Station 1, iya ginpahayag nga nagpadulong ang ila imbestigador sa probinsya sang Antique agud magkoordinar sa pamilya sang biktima.
Sa amo nga tion, gintumod sang himata ni Salazar nga masami ini nagapadulong sa Distrito sang Arevalo kag Mandurriao.
Suno kay Tabuyoc, base sa pagpangusisa nila sa asawa sang biktima, wala namensyonar ni Salazar kon ano ang iya transakyom antes paman ini nagbiya sa Antique.
Ginalantaw man sang talatapan ang anggulo nga drug related case ang natabo kay Salazar bangud sa nangin anay kaso sini.
Una na nga ginpahayag sang San Jose de Buenavista, Antique Municipal Police Station nga nagsungka sa ila talatapan si Salazar sang Hulyo 14, 2016 sa tion man sang war on drugs ni Former Pres. Rodrigo Duterte.
Kon balikan, naghalin ang biktima sa ila nga puluy-an sang Enero 22, 2025 apang wala matul-id kun ano ang transaksyon sini.
Base sa inisyal na imbestigasyon, nakaagum ini sang pilas sa iya ulo, patimaan nga ginlampusan ini sang matig-a nga bagay.
Nahibaluan nga si Salazar ang anak sang former Vice Mayor kag subong incumbent punong barangay sang Barangay 2, San Jose, Antique nga si Nestor Angel O. Salazar.
