𝗢𝗧𝗢𝗡, 𝗜𝗟𝗢𝗜𝗟𝗢 – Masami nga nagalagaw sa tion sang kagab-ihon kag kaagahon na kun magpauli ang lalaki nga nasapwan patay sa kilid sang baybay sang Barangay Poblacion East, Oton, Iloilo.
Ang biktima amo si Marcelino Todorejos Sr., 59, kasado, residente sang Barangay Poblacion South, Oton, Iloilo kag nagatrabaho bilang laborer.
Sa interview sang Bombo Radyo kay Mary Jane Todorejos, anak sang biktima, iya ginpahayag nga naka-updanay pa sila kahapon sang iya amay nga nagpang-scrap sa C1 Road kag matapos sini, nagkaon pa sila sang Batchoy kag Halo-Halo.
Suno kay Mary Jane, nag-una ini pauli sa ila balay kag nagpadulong sa balay sang iya hinablos.
Samtang, wala naman ini sang ideya kun sa diin nagpadulong ang iya amay.
Kampante man ini nga mapauli man ang iya amay bangud masami nga kaagahon na niya ini pirme nga maabtan sa ila balay.
Subong nga adlaw, plano pa nila kuntani sang iya amay nga magpang-scrap sa liwat.
Apang, amo na lang ang iya kasubo matapos ginpahibalo sang iya iloy nga nasapwan na nga patay ang ila amay.
