ILOILO CITY- Nakilala na ang driver nga napatay matapos masunog ini sang nagbungguanay ang ginamaneho niya nga motorsiklo kag isa ka truck sa Barangay Supa, San Jose de Buenavista, Antique.
Ginkilala ang biktima nga si Joy Manzano, 58-anyos, residente sang Brgy. 6, San Jose, Antique kag empleyado sang Local Government Unit sang Antique.
Ang driver naman sang truck amo si Eusebio Dellava Gallano, 31,residente sang Sta. Barbara, Iloilo.
Sa interview sang Bombo Radyo kay Police Major Benjo Clarite, hepe sang San Jose de Buenavista Municipal Police Station, iya ginpahayag nga naghalin sa bahin sang San Remigio, Antique ang motorsiklo sang nag-overtake sa ginasundan nga salakyan kag wala natalupangdan ang nasugata nga truck gani natabo ang bungguanay.
Ginyudyod pa sang truck ang motorsiklo kag hinali lang nga nagkalayo kag nasunog gid ang duha ka salakyan kalakip na si Manzano.
Nakapanaug ang driver sang truck kag pahinante sini rason nga nakaluwas ang mga ini.
Nag-aregluhanay naman ang himata sang napatay nga biktima kag ang driver sang truck.
