Imagine kun kabuot man sa imo nga klase sang tawo kag wala ka man nagapanghilabot sa kabuhi iban apang gindakop ka gihapon bangud katukayo mo ang isa ka kriminal!?
Natabo ini sa isa ka lalaki nga si Rene Martinez Guttierez, isa ka 46-anyos nga residente sang Colombia, indi lang isa ka bes kundi tatlo gid ka beses!
Sa masobra isa ka dekada, tatlo ka beses gid siya nga gindala sa presuhan bangud nagsala ang mga pulis sa rason nga pareho sila sang pangalan sang isa ka drug dealer sa Peru nga wanted indi lamang sa iya pungsod kundi bisan diin nga bahin sang kalibutan.
Ginpahayag nga ang pinakaulihi nga pagdakop kay Guttierez ang natabo subong gid lamang nga bulan sang nagbalik ini sa Colombia agud kuntani nga bisitahon ang iya nga amay.
Ginpalapitan siya sang Interpol officials sang nag-abot siya sa airport kag gilayon nga gindagdagan sang warrant of arrest.
Sang 2010 suno sa rekord, walo man siya ka adlaw nga nanimuron sa presuhan sang naghapit lang kuntani siya sa police station agud magkuha sang judicial record para sa iya gintukod nga negosyo.
May yara man sang tion nga duha ka bulan siya sa presuhan kadungan sang report nga may kinawatay sa iya ulubrahan.
Suno sa asawa ni Rene, pareho ang pangalan kag ang date of birth sang iya bana sa tawo nga wanted bangud kakuntyaba ini sang isa ka lalaki nga nag-ship sang 20 ka kilo sang cocaine sa Peru sang 2006.
Sa subong, sa masubo nga palad, yara gihapon si Rene sa Los Martires police station kag nagahulat nga patihan sang mga pulis ang mga dokumento nga gin-presentar nga indi siya ang matuod nga kriminal. ##
