Nakapalagyo ang subject kag arestado naman ang live-in partner sini sa ginpatigayon nga drug buy bust operation sang Iloilo City Drug Enforcement Unit (CDEU) sa Alta Tierra Village, Brgy. Balabago, Jaro, Iloilo City.
Ang nakapalagyo amo si alias Ronald, 47, residente sang Pavia, Iloilo; samtang ang nadakpan naman amo si alias Nene, 25, kag ginapahayag nga taga-Guimaras.
Ang duha ang lunsay gintumod sang CDEU nga high-value individuals.
Sa interview sang Bombo Radyo kay Police Captain Ryan Christ Inot, head sang CDEU, iya ginpahayag nga si alias Ronald amo ang una nga ka-transaksyon sang pulis apang namutikan sini nga mga otoridad ang iya ka-istorya, gani gulpi ini nagdalagan.
Yara naman sa sulod sang balay ang babaye, kag nadakpan ini bangud ginaalegar nga siya kuntani ang magakuha sang suplay nga ginasugo sang lalaki.
Naglab-ot sa 100 gramos sang suspected shabu ang nakumpiskar nga katumbas sang balor nga P680,000.
Suno kay Inot, nakaagi na anay preso si alias Ronald sa New Bilibid Prison kag nakaguwa lang paagi sa plea bargaining agreement, apang sang tion nga ginpatigayon ang drug buy bust, under probation pa ang subject.
Ginpahayag nga gina-arkilahan lang nila ang balay sa Alta Tierra — isa ka strategic area para sa ila operasyon kun sa diin ginapakadto lang nila ang ila mga suki kag parokyano.
Nakahunong na sa custodial facility sang police station 9 ang babaye kag natalana nga mag-atubang sang panumbungon nga paglapas sa Republic Act 9165 ukon ang Comprehensive Dangerous Drugs Act of 2002.#
