May mga “sabaw moments” gid kita nga kun kaisa kaladlawan, pero kun kaisa, budlay gid ya bawion!
Kaangay sining isa ka lalaki sa Michigan, USA nga si Corey Harris.
Sang nagligad nga adlaw, schedule sini sa hearing sa korte apang wala siya pisikal nga nagtambong kundi nag-connect lamang paagi sa Zoom call.
Ang problema ugaling, sang amo nga tion, ang hearing ang naangot sa suspendido nga driver’s license ni Harris, apang timing man nga sang naga-tambong siya via Zoom, nagamaneho siya sang iya salakyan.
Gilayon nga nabisto ni Judge Cedric Simpson ang akusado nga yara sa sulod sang iya salakyan kag iya pa ginpamangkot kun naga-drive ini.
Napilitan si Harris nga papunduhon ang iya salakyan kag ginrason sini nga pakadto siya sa iya nga doctor gani nga nagamaneho siya.
Daw indi pa makapati ang judge gani namangkot pa ini sa isa ka partisipante sa hearing kun husto bala ang kaso nga ila ginatutukan nga amo ang parte sa kaso ni Harris nga may suspendido nga lisensya.
Nahibaluan nga antes sini, temporaryo nga nahilway si Harris bangud sa piyansa kag naga-apelar pa kuntani ang abogado nga ipaiway pa kuntani sang apat ka semana ang hearing sa iya kaso.
Apang bangud nga nabisto siya sang judge nga naga-drive samtang naga-attend sang hearing, ginkanselar ang iya pyansa kag ginsugo ini nga magsungka sa otoridad para ma-detain. Sang nabatian ni Harris ang desisyon sang judge, napa-“Oh my God” na lang siya sa iya nahimo nga kapalpakan.
