TOBIAS FORNIER, ANTIQUE– Padayun pa nga ginabulong sa hospital ang isa ka lalaki matapos natiruhan sang wala pa nakilala nga mga suspek sa Brgy. Barasanan Viejo, Tobias Fornier, Antique.
Ang biktima ang ginkilala nga si Jisar Rubinos, 28, kasado, sang Brgy. Igcadac, Tobias Fornier, Antique.
Sa interview sang Bombo Radyo kay Police Staff Sergeant Elmer Paroja, imbestigador sang Tobias Fornier Municipal Police Station, iya ginpahayag nga padayun pa ang ila imbestigasyon sa nagluntad nga insidente.
Suno kay Paroja, samtang nagatindog ang biktima sa pwertahan sang gina-istaran nga balay, hinali lang nga may nabatian nga sunod-sunod nga linupok.
Bangud sa kahadlok, nagpanago ang mga tawo sa sulod sang balay sang nakita nga duguon na ang biktima.
Nakaangkon naman sang pilas sa likod, sa ibabaw nga bahin malapit sa abaga, sa nawala nga dulunggan kag naglapos pa sa idalom sang iya mata.
Nakuha sa crime scene ang 12 ka empty shells sang 9mm sa diin ang 10 sa mga ini ang yara sa dalan samtang ang duha ang yara sa balkon sang balay.
May yara man sang unidentified slug nga nakuha sa sulod sang balay ni Rubinos.
Padayun pa nga ginahibalo ang identity sang duha ka mga suspek nga nakasakay sa motorsiklo.
