Patay ang isa ka lalaki matapos nga ginbuno sang amay sang iya live-in partner sa Zone 2, Brgy. San Juan, Molo, Iloilo City.
Ang biktima amo si Alyas Carl, 26-anyos , samtang ang suspek naman amo si Alyas Puyo, 46-anyos, kasado kag pareho nga residente sang nasambit nga barangay.
Sa interview sang Bombo Radyo kay PLt. Mary Ann Liba, Deputy Station Commander sang ICPS4, ginpahayag sini nga makadto kuntani ang biktima kag ang anak sang suspek sa Barangay Hall agud nga i-settle ang problema kaangot sa ginaalegar nga pagsakit sang biktima sa live-in partner sini.
Apang, gulpi na lang nga naglumpat ang suspek sa tricycle kag ginbuno ang biktima sang makapila ka beses.
Suno kay PLt. Liba, gilayon nga gindala sa Iloilo Doctors Hospital ang biktima apang gindeklarar ini nga dead-on-arrival bangud nakaagum ini sang pila ka patal nga pilas sa dughan.
Sa subong, padayon ang imbestigasyon kag pagpangita sang mga otoridad sa suspek nga nagpalagyo matapos ang insidente.
