ILOILO CITY – Patay ang isa ka lalaki matapos ginbuno sang wala pa nakilala nga suspek sa Barangay Jelicuon Montinola, Cabatuan, Iloilo.
Ang biktima amo si Ceraste Pangcrudo, 26, residente sang nasambit nga lugar.
Sa interview sang Bombo Radyo kay Police Captain Dionisio Estacio, acting chief of police sang Cabatuan Municipal Police Station, iya ginpahayag nga naka-agum ang biktima sang lima ka pilas sa dughan kag gindeklarar nga dead-on-arrival sa Ramon Tabiana Memorial District Hospital sa Cabatuan, Iloilo.
Natabo ang insidente 15 metros ang antad nagikan sa balay ni Jonel Jordan kun sa diin sila nag inum-inom.
Suno kay Estacio, indi pa matumod kun sin-o ang suspek sa lima nga naka-upod inom sang biktima.
Dugang pa ni Estacio, wala nasaksihan ni Jordan ang natabo bangud nga naglisensya ini nga mag-una tulog.
Sa subong, padayon pa ang hot pursuit operation sang kapulisan kag kabahin sang gina-imbestigiran ang mga kaupod niya sa pag-inom.
