Lalaki, patay matapos ginkagat kag ginburambudan sang magkal sa Mandurriao, Iloilo City

Patay ang isa ka lalaki matapos ginkagat kag ginburambudan sang daku nga man-og (python) sa Dike 1, Barangay Bolilao, Mandurriao, Iloilo City.

Sa interview sang Bombo Radyo kay Police Captain Val Cambel, hepe sang ICPS 10, iya ginpahayag nga isa ka magkal nga ginabulubanta may kalabugon nga 3.5 metros ang nag-atake sa biktima, nga ginkilala kay alyas Julius, ginabanta nagapang-edaron sang 30-anyos kag residente sang Barangay Hibao-an, Mandurriao.

Suno kay Cambel, nga posible nalapakan sang biktima ang man-og, rason nga gintukob ini sa tuhod kag kamot antes ginburambudan sa liog kag lawas.

Paathag man ni PCapt. Cambel nga indi venomous ang amo nga man-og kag posible constriction ukon ang hugot nga pagpulupot sang man-og ang rason sang kamatayon sang biktima.

Sa separado naman nga interview sang Bombo Radyo sa isa ka pumuluyo sa lugar, ginpahayag ni alyas Lyn nga nagtuga sang kahangawa ang nasambit nga insidente, ilabi na sa seguridad sang mga kabataan nga nagahampang malapit sa lugar.

Sa panaysayon ni Alyas Lyn nga nakakita sa biktima, gilayun ini nga nangayo sang bulig sa mga kaiping nga pamalay sang nakita niya ang kahimtangan ni alyas Julius.

Dugang pa sini nga gilayun naman nga nagpadulong ang mga tawo sa balay sang biktima kag ginpatay sang mga residente ang man-og nga nakapulupot sa ulo sang wala na sang kabuhi nga si alyas Julius.

Suno pa sa mga pumuluyo nga ila masami makita ang mga daku nga man-og sa lugar ilabi na kun high tide, rason nga nagdugang ang ila kahangawa nga may nabiktima ang amo nga mga sapat nga nag-utas gid sang kabuhi sang isa nila ka pumuluyo.