Patay ang isa ka lalaki matapos nga ginpulihan buno sang mga mag-utod sa Baranggay. Toyungan Calinog, Iloilo.
Ang biktima amo si alyas Ryan 33, single, kag residente sang nasambit nga lugar.
Samtang ang mga suspek amo sanday Gilmar Lozada, 30, kag ang utod sini nga si alyas Alexies 24, lunsay residente sang nasambit man nga Barangay.
Sa interview sang Bombo Radyo kay Police Major Miles Dieron, hepe sang Calinog Municipal Police Station, iya ginpahayag nga lunsay hubog ang mga biktima kag suspek sang nagsinugataay kag nagbina-isay nga nagresulta sa pagpangbuno sang mag-utod.
Suno kay Dieron, sa tunga sang pagbinaisay, gilayon nga nagbunot sang kutsilyo ang mga suspek kag ginpulihan buno ang biktima.
Nakaangkon ini sang madamo nga pilas sa nagkalain-lain nga parte sang iya lawas.
Gilayon man gindala si alyas Ryan sa Calinog District Hospital, apang gindeklarar nga dead on arrival (DOA).
Nagpatigayon naman sang hot pursuit operation ang mga otoridad, kag nadakpan gilayon ang duha ka mga suspek.
Sa subong, yara na sa kustodiya sang mga kapulisan ang mga suspek kag posible nga magapangatubang sang kaso nga murder.
