ILOILO CITY – Patay ang isa ka lalaki nga rider matapos nagbunggo ang iya ginamaneho nga motorsiklo sa isa ka isa ka truck sa intersection sang Circumferential Road-Sunset Boulevard, Brgy. Sooc, Arevalo, Iloilo City.
Ang biktima amo si Bryan Beltran, 23, may-asawa, isa ka waiter, kag residente sang Kasing-Kasing, Molo, Iloilo City.
Ang angkas naman sini amo si Noel Panganiban, 25, soltero, waiter, kag residente sang Brgy. San Nicolas, Oton, Iloilo.
Ang truck ang ginamaneho naman ni Elizer Gomez , 49 , may-asawa, residente sang Awihao, Santa Rosa, Danao City, Cebu.
Sa interview sang Bombo Radyo kay Police Chief Master Sergeant Dennis Yee, investigator sang Traffic Investigation and Enforcement Unit sa Iloilo City Police Office, iya ginpahayag nga nag-inom pa ang biktima sang makahulobog nga ilimnon sa Sunset Boulevard antes natabo ang aksidente.
Suno kay Yee, idul-ong kuntani sang biktima ang iya angkas sa Oton, Iloilo, apang bangud hubog ini, nadulaan ini sang control sa motorsiklo.
Bangud sa mabaskog nga impact, nag-angkon ang biktima sang pilas sa ulo nga nagresulta sa internal bleeding.
Gindala pa ini sa ospital, apang gindeklarar sang doctor nga dead on arrival.
Nag-angkon naman sang pilas sa tuhod kag agtang ang angkas sini.
Samtang, suno naman kay Sim Sanchez, pahenante sang truck, madasig ang pagpadalagan sang biktima sang iya motorsiklo.
Ginpahayag sini nga nakibot na lang sila sang nagbunggo na ang motorsiklo sa nalikod nga bahin sang truck.
Pagpanaog nila, nakita na nila nga duguon na ang biktima kag wala na nagahulag.
