Patay ang isa ka lalaki matapos nga nakuryente sa Center Island sang General Luna St., Iloilo City Proper.
Sa interview sang Bombo Radyo kay Police Lieutenant Romel Tabuyoc, Officer in Charge sang Iloilo City Police Station 1, iya ginpahayag nga padayon pa nga ginahibalo sang talatapan ang identity sang biktima bangud santo sa pahayag sang mga traffic enforcer sa lugar, masami ini nga nagaliho-liho.
Suno kay Tabuyoc, nagtuyo nga magtabok ang biktima sa pihak nga bahin sang dalan kon sa diin, gin-uyatan sini ang isa ka open wire nga alambre agud kontani maka-agi.
Ginpahayag man sini nga pasado ‘las-5:00 sang hapon, nakit-an na nga daan sang pila ka traffic enforcers ang biktima apang wala sila naglaum nga nakuryente na ang biktima.
Gindala pa sa Saint Paul’s Hospital ang biktima apang gindeklara man nga dead on arrival.
Ginkumpirma naman sang MORE Electric and Power Corporation nga may kuryente ang alambre nga nakaptan sang biktima nga nagserbe nga harang agud nga indi pag-agyan ang amo nga porsyon sang Center Island.
