ILOILO CITY – Patay ang isa ka lalaki matapos ginluthang sang riding in tandem suspects sa Brgy. Balabago, Jaro, Iloilo City.
Ang biktima ginkilala nga si Ricky ‘Bongbong’ Jinon, ginabanta sa 50 anyos sang Barotac Nuevo, Iloilo, isa ka electrician kag ginapahayag nga naka-istar man sadto sa Brgy. San Isidro sa distrito sang Jaro.
Sa interview sang Bombo Radyo kay Punong Barangay Edgar Arañador sang nasambit nga lugar, iya ginpahayag nga nakabati sila sang tatlo ka sunod-sunod nga lupok kag daw kaangay nga ginbantayan gid sang mga suspek ang biktima.
Suno naman kay Myra Panolino, isa sa mga nakakita sa insidente, nakita na lang niya nga natumba ang biktima matapos ang pila ka lupok.
Apisar nga natumba na ang biktima, padayon sa gihapon ang pagluthang sang mga suspek.
Gilayon nga ginpadangat sa hospital ang biktima apang ginbawi-an sang kabuhi.
Sa subong, wala pa nadakpan ang mga suspek kag ginahibalo pa ang motibo sa krimen.
May kaangtanan diri, wala sang record sa illegal nga droga ang biktima santo sa kumpirmasyon ni Punong Barangay Felix Dureza sang San Isidro, Jaro.
Suno kay Dureza, nagatrabaho sadto si Jinon sa Task Force Boltahe sang syudad sang Iloilo, nangin kabahin man sang General Services Office antes ang early retirement.
Si Jinon ang masami nga ginatawag sang mga punong barangay agud magkay-o sang linya sang kuryente kag nagapangontrata sadto sa tion sang Jaro Agro-Industrial Fair sa Jaro Plaza.
