Ginbawian sang kabuhi ang isa ka lalaki sa Palanguia, Pototan, Iloilo matapos ini ginpulihan buno sang mag-utod.
Ang biktima amo si Jeuz Aldemo Parreño, 27-anyos, residente sang Alegria, Dingle, Iloilo.
Ang mga suspek amo sanday Jerol Pedregosa, 27-anyos, kag Joebert Pedregosa, 25-anyos, lunsay residente sang Alegria Dingle, Iloilo
Sa interview sang Bombo Radyo kay Police Captain Jersey Besas, OIC sang Pototan MPS, iya ginpahayag nga galakat papauli ang biktima kaupod ang mga suspetsado humalin sa ginaubrahan nga uma sa Palanguia, Pototan sang gulpi lang ini nag baisay nahanungod sa duta.
Suno kay Besas, ang pagbinaisay ang naglab-ot sa pag panglabo kon sa diin, nakadalagan pa ang biktima agud kontani magpalagyo.
Nakaagum sang pilas sa abaga, likod, kag pila ka parte sang lawas ang biktima nga gintunaan man sang iya kamatayon.
Samtang nakaagum naman sang pilas sa alatrasan si Jerol Pedregosa.
Gilayon man nga nadakpan ang mga suspetsado, apan padayon ang imbestigasyon sang kapulisan sa natabo nga insidente.
